Just Married

sabi ng kotseng pinuluputan ng mga bulaklak at mga ribbon. Di mo tuloy malaman kung sasakyan ba ito o float o regalo mismo sa kinasal. At habang lumalaon, sa tuwing nakakabasa ako ng JUST MARRIED, parang naririnig ko ang mag-asawang nagsasabi ng ganun na nga. "We're not in love, we're just married, okay?" Till death do us fight!

     Kaya kung ako lang talaga, mas gusto ko ang HAPPILY MARRIED. Hindi mo nga lang maiwasang mag-wonder kung sino sa dalawa yung feeling happy at sino yung feeling married.

     True to form, matagal na yung limang taon. Kasawaan, wala nang mapag-usapan, nag-iba na ang "career paths". Euphemisms for lousy sex, actually. At syempre para mabuo yung kwento ni Rosalinda, kailangan may third party. Sabi nga ng pag-aaral, 50% admit na may third party involved. At yun namang natitirang kalahati ay magaling lang magsinungaling!

     Bukod sa singles at couples, siguro marami-rami rin ang sasali pag may magtayo ng Triples for Christ. O di kaya mas generic na lang na Multiples for Christ.  May slogan na agad, "Go and multiply!"

     Aywan ko ba kung bakit sa naglipanang kaso ng mga naudlot na mga pangako, sugatang puso at pinagdamutang mga pangarap, ang dami pa ring atat na atat na makapag-asawa. Hala, work-out dito, derma doon. Blind date, diet to death. Chance texting, penpal, phonepal, singles' bar, card reading, WAP chat. Kung anu-ano na ang ginagawa ng mga tao para lang ika "makahabol sa biyahe". A basta, para sa pangit na tulad ko, I take the chances of getting married at face value.

     Masarap nga namang namnamin ang tatanda kang may kaagapay, kapanalig at makakaaway habang ikaw ay nabubuhay, ano. Yun bang 80 years old na kayo, nakaupo sa hampasangdagat ng Manila Bay, magkakapitpalad na sinisilayan ang nagpapaumanhing araw. At tatanungin mo nang pabulong ang iyong kabiyak, "Naiisip mo ba ang naiisip ko, Isabel?"  "Oo, Gorio.. masama."

     Sabagay, understandable naman na may mga nagpapakasal.  We are at least allowed to make one major mistake in our life hehe.  Pero, mag-asawa uli???!!!

     Nakaka-tempt na usisahin itong nakakaaliw na usapin ng pangangalap ng mapapangasawa pero saka na lang muna. Mas qualified si Soriano at si Almeda sa mga bagay na yan.

     Ang talagang interesado tayo tungkol sa "just marriages" ay ang kabaligtaran nito. Ang unjust marriages. Medyo trying hard yung pitik pero pwede na, di ba. At dito ko medyo tatawaran ang kilusan ng mga kababaihan.

     Naghintay na ako ng mga dalawang linggo at wala pa rin akong narinig na kahit whimper mula sa kanila. Kaya hirit lang ng konti. Hindi ko lang matanggap na ang Guyod (Bisaya for drag) ay isang understandably cultural practice. Na basta na lang mandudukot ng mapapangasawa ang Abu Sayyaf dahil ito ay tanggap na kaugalian ng may kaugalian.

     Hindi ba universal ang usapin ng integridad ng mga karapatan ng pagkatao kundiman pagkababae? Hindi man ako babae, hindi lang talaga ako mapalagay. Please enlighten me.

-----<>-----