6,000,000,000 divided by 6,000,000,000
 

Nitong taon na ito, ang population ng daigdig ay umabot na sa 6 billion. Obviously may isang hilig ang sangkatauhan na mahirap pigilan. Biro n'yo, anim na billion! Paano nangyari yun? Sino ba ang mga gumawa nitong 6,000,000,000 na mga taong ito? Yung lolo mo, yung tatay at nanay mo, yung lola ng lolo mo at baka kasama ka na rin sa mga may kagagawan nitong six billion na mga tao.

     Ang madaling sagot dito ng mga meron ay family planning. Ang iba, contraception. Ayaw ng simbahan, pero ginagawa ng mga maninimba. Minsan nga ginagawa rin ni Father.  Okay lang yun, Father. At kung ako ang tatanungin, dapat nga magparami ang ang mga pari dahil mababait silang tao at kulang na kulang ang mga pari sa dinami-dami ng mga baryo at barangay. At kaya naman kakaunti ang mga pari dahil wala silang son. E, di nga ba like father like son?

     Pero balik muna tayo sa six billion. Hindi ko man kayo makumbinsi na magpigil-pigil ng hilig ng konti o gumamit ng mga contraceptives, isipin naman natin kung ano ang kalagayan ng six billion na tao bago natin dagdagan.

     Sa six billion, 1.1 billion ay walang access sa safe drinking water at 2.9 billion ang walang adequate sanitation. Ang naninirahan sa tinatawag na sub-standard housing ay 4.8 billion.

     Halos kalahati ng teenagers ay naninigarilyo, at ang mas mapapabilis ang pagkamatay dahil sa paninigarilyo ay 500 million.

     3.5 billion ay galing sa Asia. Mahalagang bigyang pansin ito dahil tayo ay Asians. Kung saan pa ang mas maraming mahihirap, doon pa mas mahusay ang pagawaan ng tao. Ito raw ika ay dahil sa ating paniniwala na ang pagkakaroon ng maraming anak ay kayamanan at biyaya ng Panginoon. E, yung Panginoon nga, iisa ang anak!

     Ang Chinese ay 1.25 billion, ang Hindu (India) ay 1 billion at ang mga Pilipino ay 80 million lang naman. Hindi naman pala tayo ang pinakamahilig. Ang nagsasalita ng Ingles ay 516 million samantalang ang nagsasalita ng Mandarin ay 990 million. Pero tayo mas nakakapagsalita ng Ingles na di hamak kaysa Mandarin. Ibig sabihin, wala sa paramihan yan, kundi nasa pananakop!

     2.8 billion ang kababaihang na-rape o pinagtangkaan. 1.2 billion ang hindi marunong bumasa. At 6 million lang ang may computer. Sa six billion, 30 million ang sundalo, 20 million ang refugees, pero 6 million lang ang duktor.

     60 million ang namamatay taun-taon; ang 18 million sa gutom, ang 6 million sa cancer, at ang 12 million ang namamatay na bagong panganak o mga sanggol pa lamang. 360 million ang mahigit sa 65 years old samantalang 2 billion ang mga bata (children). Ang isip-bata walang datos kung ilan, pero di hamak na napakarami.

     300 million ang lesbians, gays at bisexual.

     At ang pinakamasakit na datos sa lahat: Sa 6 billion na katao na yan, mahigit ng konti sa kalahati ay mga babae. Napakasaklap ng buhay dito sa mundong ibabaw. Mahigit tatlong bilyong kababaihan! Tapos kahit isa wala man lang magkagusto sa akin.

-----<>-----