Chapel Songs

Kaunting Kwento Tungkol sa Kamalayang Kaalagad
Ang Kaalagad ay isang maliit na ecumenical community sa Pilipinas. Nabuo ito noong December 2000, sa kalagitnaan ng impeachment proceedings ni Erap. Ngunit ang diwa at tradisyon ng pagsibol nito ay may mahaba nang kasaysayan. Noong araw pa man, ang mga kasama ay malaon nang nasasangkot sa mga pagkilos at aktibismo sa udyok ng paniniwalang ang mabuting balita na pinahayag ni Hesus ay may napakalaking kinalaman sa pagdulot ng pag-asa lalong-lalo na duon sa mga naglipanang dahop at gapi.
Bakit, sinu-sino ba yung mga yon? Isa na roon ang mga kapus sa kabuhayan. Hindi sapat ang pagkain, tirahan at edukasyon; mapanganib ang palibot at walang maiging trabaho; marumi ang iniinom at nilalanghap; sakitin at subsob sa pagod. Isa pa ang mga may kapansanan; mga naaabusong mga bata at kababaihan; mga nadedehado nang dahil sa kanilang lipi, lahi at pagkatao. Kasama rin dun ang mga nadadawit sa mga tunggalian ng mga idolohiya, relihiyon at paniniwala. At maging ang kalikasan ay biktima rin ng pang-aabuso ng tao na rin mismo.
At bakit nagkaganito? Sa kamalayang kaalagad, ito ay bunga ng pagmamataas at pagmamalabis sa samutsaring anyo at antas nito. At ano naman ang maaring lunas? Paglilingkod at pamumuhay nang sapat. Hindi ito madaling gawin, ngunit dahil na rin sa kaiga-igayang halimbawa ng mga mapagpakumbabang aktibistang katulad ng Panginoong Hesus, hindi ito suntok sa buwan. At masaya pa hehe~

Ang Chapel Songs Project

ay munting ambag ng Kaalagad sa mga pamayanang Kristiano sa Pilipinas (at pati na rin marahil sa mga Pilipino na napalawig sa ibang dako ng mundo). Gaya rin ng iba, batid ng Kaalagad ang kahalagahan ng liturhiya sa buhay-buhay ng mga maliliit na komunidad. At di rin kaila na sa mga pagtitipon ay suking sangkap ang mga huni at awitin. Tinagurian naman po itong Chapel Songs (mas maganda minsan pakinggan sa ingles hehe, kesa naman mga kantang pangkapilya) dahil na rin sa naniniwala ang Kaalagad na nasa mga munting pamayanan ang diwa ng ebanghelyo at hindi sa tinataguriang ‘institutional’ o hierarchical church.

Dominic Benedicto RECORDING ENGINEER

Yna Miranda-Dalisay LINE PRODUCER